قصه واقعيه

يوم في عمري .. لاني حسيت بإيد امي وهي بتحاوطني .. وحسيت كأني متغطي بعشر بطاطين.. وانا نايم ضحكت في بالي وقولت لنفسي أنا متغطي أكتر منك يا فهد .. وماما جنبي طول الليل كمان.
عدى كام ساعة وصحبت مڤزوع على صوت عمتي وهي بتقولي 
_ قوم ياض انت .. قوم بسرعة معروف جاي .. جوزي رجع من السفر وفي طريقه للبيت لو شافك هتبقى مشكلة .. قوم انت لسه هتنحلي.

مسكتني من رجلي وشدتني بقوة .. سابتني واقع على الارض وعمال أغمض وافتح عيني وجسمي همدان.. كنت شايفها عمالة تجري في الشقة وتوضبها .
بعد ساعة بالظبط ىن جرس الباب .. كانت المرة الاولى اللي اشوف فيها عم معروف جوز عمتي .. شكله يخوف .. طويل وعريض وشنبه كبير ومكشر كدا طول الوقت.
لما شاف عياله خدهم بالحضن ولما شافني قال لعمتي بصوت عالي 
_ ومين ده كمان يا هانم.
قالتله وهي بتترعش  
_ ده .. ده عمار ابن فايز اخويا.
أتعصب أكتر وقالها بصوت عالي لدرجة ان الجيران اتلموا 
_ نعم يا اختي .. ابن اخوكي.. انتي فاتحه بيتي تكية .. ملجأ .. وإبن أخوكي بيعمل ايه هنا.
قرب فهد مني وهو بينغزني في جنبي وبيقولي 
_ عجبك كدا يا بوز الإخص .. الخناقة دي بسببك .. جتك الأرف.
كانت بترد عليه پخوف والكلام بيهرب منها .. الباب كان مفتوح .. حسيت ان محدش عايزني وإن انا فعلا السبب في اللي بيحصل ده زي ما فهد قالي.. علشان كدا استغليت جموع الجيران اللي بدأوا يتجمعوا عند الباب وخرجت وسطيهم .. خرجت ونزلت من على السلم ومنه للشارع.
فضلت ماشي ومش عارف رايح فين.. مشيت ومشيت وبعدت أكتر عن بيت عمتي .. كنت بتنفض لاني ملبستش الچاكت بتاعي والجو زي ما انتوا عارفين برد .
فضلت ماشي مش عارف قد ايه لحد ما شوفت مطعم بيبيع فول وطعمية .. كنت جعان ومن اليوم اللي قبله عمتي مأكلتنيش أي حاجة.. دخلت المطعم وقولت للراجل اللي بيعمل الأكل
_ والنبي يا عمو انا